Cəlilabad rayonunda yetişdirilən tərəvəz məhsullarının yığımı davam edir. Bu haqda məlumatı Cenublu.az bu gün, 24 avqust tarixində Azertac-a istinadən verir.
Ən yüksək məhsuldarlıq yazlıq kartofda qeydə alınıb. Bu mövsüm sahələrdən 160 min tona yaxın kartof məhsulu yığılıb. Yazlıq əkilən sahələrdən bu günədək 20 tondan çox pomidor, 13 ton xiyar, 34 ton soğan, 644 ton sarımsaq, 6160 ton noxud məhsulu tədarük olunub. Digər tərəvəz məhsullarının yığımı davam etdirilir.
Ümumilikdə isə yerli istehsalçılar növbəli əkin prinsipinə uyğun olaraq, demək olar ki, istifadədə olan torpaqları boş qoymurlar. İl ərzində suvarılan torpaqlarda 3, bəzən 4 dəfə müxtəlif növ tərəvəz məhsulu yetişdirə bilirlər.
Cəlilabad Dövlət Aqrar İnkişaf Mərkəzindən verilən məlumata görə, istehsal olunan tərəvəz məhsullarının təxminən 70 faizi intensiv üsulla becərilən sahələrdir. Builki orta məhsuldarlıq da qənaətbəxşdir. Ən yüksək nəticə isə kartofda qeydə alınıb. Orta məhsuldarlıq 290 sentner olub.
Hazırda rayonda məhsul yığımı ilə yanaşı, bəzi kənd təsərrüfatı bitkilərinin becərilməsi üçün şum işləri davam etdirilir.
