Cəlilabad rayonunda Vətən müharibəsi şəhidi Elvin Azad oğlu Şükürlünün adını daşıyan küçənin açılışı olub. Bu haqda məlumatı Cenublu.az bu gün, 19 sentyabr tarixində verir.
Açılış mərasimində Cəlilabad Rayon İcra Hakimiyyətinin başçısı Rafiq Cəlilov, aparatın məsul şəxsləri, idarə-təşkilat rəhbərləri və şəhidin ailə üzvləri iştirak ediblər.
Qeyd edək ki, Elvin Şükürlü 1997-ci ildə Cəlilabad rayonunda anadan olub. Orta təhsilini Cəlilabad rayon Şiləvəngə kənd məktəbində alıb. 2011-2014-cü illərdə C.Naxçıvanskı adına Hərbi Liseydə təhsil alıb. 2014-2018-ci illərdə isə AAHM-də təhsil almış və 2018-ci ildə motoatıcı ixtisası üzrə AAHM-i leytenant rütbəsi ilə bitirib. Elə həmin dövrdən 2020-ci il 28 sentyabra qədər Daşkəsəndə N saylı hərbi hissədə tağım komandiri kimi xidmət edib. Elvin Şükürlü 27 sentyabr 2020-ci ildə başlayan Vətən müharibəsində iştirak edib. Murovdağ uğrunda gedən döyüşlərdə itkin düşüb. 2021-ci il yanvar ayının 22-də II Şəhidlər xiyabanında dəfn olunub.
Ölümündən sonra “Azərbaycan bayrağı” ordeni, "Vətən uğrunda" medalı, "Kəlbəcərin azad olunmasına görə" medalı ilə təltif olunub.
