Rüşvət alma ittihamı ilə həbs edilmiş Cəlilabad şəhər bələdiyyəsinin sabiq sədri Mehdi Kərimov və baş memarı Sahil Qənbərlinin cinayət işi üzrə ibtidai istintaq yekunlaşıb. Bu haqda məlumatı Cenublu.az bu gün, 7 noyabr tarixində Qafqazinfo-ya istinadən verir.
Məlumata görə, toplanmış materiallar baxılması üçün Lənkəran Ağır Cinayətlər Məhkəməsinə göndərilib. İş hakim Nahid Hüseynovun sədrliyi ilə araşdırılacaq.
Qeyd edək ki, M.Kərimov və S.Qənbərli Baş Prokuror yanında Korrupsiyaya qarşı Mübarizə Baş İdarəsi tərəfindən həbs ediliblər. Onların əlbir olaraq Cəlilabad şəhəri ərazisində torpaq sahələrinin ayrılması və sahibkarlıq obyektinin tikintisinə icazə verilməsi üçün vətəndaşlardan ümumilikdə 44 min manat məbləğində pul vəsaitini almasına əsaslı şübələr müəyyən edilib.
Təqsirləndirilən şəxslərə qarşı Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.1, 311.3.2 və 311.3.3-cü (qabaqcadan əlbir olan bir qrup şəxs tərəfindən təkrar və külli miqdarda rüşvət alma) maddələri ilə ittiham irəli sürülüb.
