Azərbaycan Respublikasının Qida Təhlükəsizliyi Agentliyinin (AQTA) əməkdaşları keçirdikləri monitorinqlər zamanı Cəlilabad rayon Təzəkənd kəndində heyvandarlıq təsərrüfatında qanunsuz olaraq at ətinin istehsalını aşkarlayıblar. Bu haqda məlumatı Cenublu.az bu gün, 11 sentyabr tarixində APA-ya istinadən verir.
Belə ki, baxış zamanı heyvandarlıq təsərrüfatında təxmini çəkisi 600 kq olan 3 baş atın antisanitar şəraitdə kəsilərək paketlərə yığılmaq üçün hazırlandığı aşkar edilib. Heyvan mənşəli məhsul müsadirə edilərək götürülüb. Özlərini ferma nəzarətçisi qismində təqdim edən qardaşlar – Toybəyi Fikrət oğlu Gözəlov, Qüdrət Fikrət oğlu Gözəlov və at ətini kəsərək satacağını bildirən Samir Ziyafət oğlu Əliyev polis əməkdaşları tərəfindən saxlanılıblar.
Tutulan Samir Əliyev bildirib ki, o, kəsilmiş at ətini paytaxta aparıb, əvvəlcədən sövdələşdiyi tanımadığı şəxsə satacaqdı.
Qeyd edək ki, kəsilən at ətindən nümunə götürülərək müayinə olunması üçün Azərbaycan Qida Təhlükəsizliyi İnstitutunun müvafiq laboratoriyasına təhvil verilib. Agentlik və rayon polis şöbəsi əməkdaşları bu istiqamətdə tədbirlərini davam etdirirlər.
