Cəlilabadda "Rəqəmsal aqronomlar" şagird düşərgəsi layihəsinin açılış mərasimi keçirilib. Bu haqda bu gün, 3 oktyabr tarixində Cenublu.az Rəqəmsal aqronomlar - şagird düşərgəsinə istinadən xəbər verir.
Mərasim layihə rəhbəri, təhsil müəssisələrinin rəhbərləri, layihənin idarə heyəti, müəllim və şagirdlərin iştirakı ilə Cəlilabad rayonu Alar kənd Heydər Əliyev adına 1 nömrəli tam orta məktəbin akt zalında baş tutub.
Tədbir dövlət himninin səsləndirilməsi və şəhidlərin əziz xatirəsinin bir dəqiqəlik sükutla yad edilməsi ilə başlayıb.
Sonra layihə barədə qısa videoçarx nümayiş etdirilib. Proyektin rəhbəri Elçin Abbasov bununla bağlı çıxış edib. Daha sonra qonaqlara söz verilib. Cəlilabad rayonu akademik Z.Əliyeva adına 7 nömrəli tam orta məktəbin direktoru Səidə Şükürova, Cəlilabad rayonu Alar kənd H.Əliyev adına 1 nömrəli tam orta məktəbin direktoru Nazim Əsgərov, Cəlilabad rayonu Alar kənd 2 nömrəli tam orta məktəbin direktoru Tahir Əsgərov, layihənin təlimçisi Fariz Rzayev, eksperti Gülər Bayramova və digərləri çıxış edərək bu proyektin şagirdlərimizə faydalı olacağından, kənd təsərrüfatında tətbiqlərinin faydalarından danışıblar.
