Cəlilabadın ucqar meşəlik ərazisində yerləşən Darlıq kəndində təhsil ocağı yoxdur. Bu haqda məlumatı Cenublu.az bu gün, 8 sentyabr tarixində verir.
Darlıq kəndində 1982-ci ildə inşa olunmuş ibtidai məktəbin fəaliyyəti 2009-cu ildə dayandırılıb və o vaxtdan bəri uşaqlar təhsilsiz qalıblar. Bu problemi 77 yaşlı Məmmədəli Qurbanov öz üsulları ilə həll etməyə çalışıb. Heç bir ali təhsili olmayan kənd sakini təhsil ala bilməyən azyaşlılara öz evində oxuma və yazma öyrədir. O, məktəbi olmayan kəndin azyaşlı sakinləri təhsildən kənar qalmasın deyə bu addımı atıb.
Bir vaxtlar yerli sakinlər tərəfindən inşa olunmuş məktəb yararsız halda olduğu üçün hazırda ondan yerli sakinlər heyvanlarını saxlamaq üçün istifadə edirlər. Kənddən kənara çıxa bilməyən valideynlər övladlarının təhsil almaları üçün onları Məmmədəli Qurbanovun yanına gətirirlər.
Lənkəran-Astara Regional Təhsil İdarəsindən bildirilib ki, dağlıq və meşəlik relyefə malik Darlıq kənd sakinlərinin çoxu köçdüyündən burada şagird sayı kütləvi halda azalıb. Buna görə də kənddə ibtidai məktəbin fəaliyyəti dayandırılıb. Yaxın gələcəkdə burada yeni məktəbin tikintisi nəzərdə tutulmayıb və şagirdlərin qonşu kəndlərdəki məktəblərin imkanından yararlanmaqdan başqa çıxış yolu yoxdur.
