Cəlilabad rayonunun Hacıismayıllı kəndində qəbiristanlığın orta əsrlərə aid məzarlıq hissəsi tədqiq olunmayıb. Bu haqda məlumatı Cenublu.az bu gün, 8 sentyabr tarixində Report-a istinadən verir.
Məlumata görə, qəbiristanlığın məzarlıq hissəsi XIV-XVI əsrlərə aiddir, lakin bir çox elementlərə görə, daha da əvvəlki dövrün mədəniyyətini özündə əks etdirir. Orada müxtəlif ölçülərdə qədim baş və sinədaşları var, onlar fərqli simvollar və həndəsi fiqurlarla damğalanıb.
Tarixçilərin sözlərinə görə, daşların üzərindəki yazıların əksəriyyəti “çərxi-fələk” (svastika) adlandırdığımız kosmoqonik işarələrdir. Həmçinin bəzi daşlarda ərəb əlifbası ilə yazılar da var.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən verilən məlumata görə, sözügedən tarixi ərazi Salyan regional idarəsinin əməkdaşları tərəfindən nəzarətə götürülüb. Eyni zamanda tarixi əhəmiyyəti nəzərə alınaraq, ərazinin daşınmaz tarix mədəniyyət abidələrinin reyestrinə daxil edilməsi üçün lazımi tədbirlər görülür.
