Cəlilabad rayonunda müasir becərmə texnologiyasının tətbiqi ilə sahələrin növbəti mövsüm üçün 600 hektaradək artırılması planlaşdırılır. Bu haqda məlumatı Cenublu.az bu gün, 22 noyabr tarixinə Azərtac-a istinadən verir.
Əsasən, İtaliya və İspaniyadan gətirilən şitillər ilk öncə yerli şəraitə uyğunlaşdırılır. Onlardan alınan xırda “bığcıqlar” təxminən 40 gün müddətində qida elementləri ilə zəngin xüsusi qablarda becərilir. Daha sonra torpağa köçürülür. İstehsalçı Vüqar Musayev də bu mövsüm çiyələk sahəsini 7 hektara qədər artırıb. Hazırda o, “Murano”, “Anjelika” və “Salandirio” çiyələk sortlarının əkinini həyata keçirir. Bu sortlara daha çox üstünlük verilməsinin səbəbi xarici və daxili bazarda tələbatın çoxluğudur.
Mütəxəssislərin fikrincə, açıq sahələrdə çiyələk yetişdirmə üsulunun bir sıra çətinlikləri var. Bütün bunları nəzərə alan fermerlər bir neçə ildir ki, əkin zamanı polietilen örtükdən istifadə edirlər. Burada suvarma yalnız damla üsulu ilə həyata keçirilir.
Qeyd edək ki, artıq iki ildir ki, ənənəvi olaraq bölgənin giləmeyvə istehsalçılarının iştirakı ilə Cəlilabad rayonunda “Çiyələk festivalı” keçirilir.
