“Bacımın iraqlı istədiyi var idi. Evdəkilər ona razılıq vermədilər. Buna baxmayaraq, danışmağa davam etdi”.
Cenublu.az-ın əldə etdiyi məlumata görə, bu sözləri məhkəmə qarşısında bacısını bel kəməri ilə boğub öldürməkdə təqsirləndirilən Məhəmməd Şahbazov (ad şərtidir) deyib.
Belə ki, Məhəmməd Şahbazov 2006-cı ildə Cəlilabadda anadan olub. Məhəmməd evə girən zaman 2003-cü il təvəllüdlü bacısı Rəqsanə Şahbazovanın internet vasitəsi ilə tanış olduğu İraq Respublikasında yaşayan “Hüseyn” adlı şəxslə danışdığını görüb. Rəqsanənin Hüseynlə sevgi münasibəti yaşadığı məlum olub. Məhəmməd bacısını öldürmək qərarına gəlib. Otaqda yerdə olan bel kəmərini (qayışı) götürüb arxasını ona çevirib gedən bacısının boynuna keçirib. Kəməri sıxaraq bacısını həyatdan məhrum edib.
Təqsirləndirilən şəxsə qarşı Cinayət Məcəlləsinin 120.2.9-cu (bir şəxsi qəsdən öldürmək) maddəsi ilə cinayət işi açılıb. Məhkəmə istintaqına Lənkəran Ağır Cinayətlər Məhkəməsində hakim Nahid Hüseynovun sədrliyi ilə baxılıb.
Məhkəmə istintaqı zamanı təqsirləndirilən Məhəmməd Şahbazova ifadə vermək üçün şərait yaradılıb. O, törətdiyi əməldə özünü təqsirli bilməyərək deyib:
“Hadisə günü səhər yuxudan oyanıb yeməyimi yedikdən sonra həyətdə velosipedimi düzəldirdim. Velosipedi rəngləmək üçün boya almaq istədim, amma anam pul vermək istəmədi. Bir az əsəbiləşdikdən sonra anam pul verdi, mən də gedib boyanı aldım. Daha sonra məsciddə işləyən atamın yanına getdim. Orada olarkən atama zəng gəldi. Nə olduğunu soruşsam da, atam heç nə demədi. Birlikdə evə getdik. Küçəyə çatanda çox adam olduğunu gördüm, həyətə girdikdə bacım Rəqsanənin vəfat etdiyi deyildi. 3 gün sonra polislər gəlib məni bacımı öldürdüyüm üçün apardılar. Rəqsanəni mənim öldürmədiyimi desəm də, inanmadılar.
Anamdan bacımın necə ölməsini soruşanda, kəmərlə özü-özünü boğduğunu dedi. Rəqsanənin istədiyi Hüseyn adlı oğlan var idi. Valideynlərim ona vermədilər, danışmağına qadağa qoydular. Amma Rəqsanə gizlin də olsa, danışmağa davam edirdi.
Onu da deyim ki, bacım dəfələrlə özünü öldürmək istəyib. Bir neçə dəfə damarlarını kəsib”.
Məhkəmə istintaqı zamanı şahid qismində dindirilmiş Rəqsanə Şahbazovanın hüquqi varisi, atası Habil Şahbazov ifadəsində göstərib ki, qızı özü-özünü boğub:
“Hadisə günü səhər saatlarında məscidə beton tökmək üçün getdim. Həmin gün oğlum Məhəmməd evdə idi. Məsciddə iş görən zaman Məhəmməd yanıma gəldi. Məhəmməd yanımda olarkən yeznəm Zaur zəng edərək təcili evə gəlməyimi istədi. Buna görə də narahat olub, Məhəmmədlə birlikdə evə getdim. Evə çatdıqda təcili tibbi yardımın qapıda olduğunu gördüm. Qızımın öldüyünü eşitdim. Dəfn işləri ilə məşğul olduqdan 3 gün sonra polislər gəlib Məhəmmədi bacısını öldürdüyü üçün apardılar. 5 aydır ki, Məhəmmədi qanunsuz həbs ediblər. Məhəmməd qorxduğu üçün belə ifadə vermişdir. Rəqsanə özü-özünü boğaraq öldürüb”.
Habil Şahbazov oğlu Məhəmməd Şahbazovun bu hadisəni törətmədiyini söyləyərək, məhkəmədən ona bəraət verilməsini xahiş edib.
Məhkəmə materiallarında əlavə olaraq qeyd edilib ki, həmin həyətdə əvvəllər oğurluq olduğu üçün kamera quraşdırılıb. Həmin kameranı Habil Şahbazovun qardaşı Xəqani Almaniyadan gətirib. Bundan başqa, Məhəmməd, Xəqani və Almaniyada yaşayan digər qardaşı Nizami də internet vasitəsilə həmin kamera görüntülərinə baxa biliblər. Hadisə baş verən gün yaşadığı evə gəldikdən sonra Habil Şahbazov qardaşı Nizaminin kameradan evdə baş verənləri görə biləcəyini düşünüb kameranı açdırıb. Lakin hadisə baş verən vaxt da daxil olmaqla axşam saatlarına qədər qeydə alınmış görüntülər kameranın üzərində olan yaddaş kartında olub. Ailə üzvləri Məhəmmədin tutulmasından sonra yaşadığı evdə olan kameranın qeydə aldığı görüntülərə baxıblar. Görüntülərdə Məhəmmədin bacısını öldürməyi təsdiqini tapıb. Bildirilib ki, Xəqani bu görüntüləri əvvəlcədən görüb. Lakin qardaşının ürəyinin dözməyəcəyindən ehtiyatlandığı üçün görüntülərdəki Rəqsanənin ölüm anını ona göstərməyib.
Məhkəmə-psixoloji ekspertizasının rəyinə əsasən, təqsirləndirilən şəxsdə hər hansı psixi xəstəliyin əlamətləri aşkar olunmayıb.
Sonda məhkəmənin yekun qərarı ilə Məhəmməd Şahbazov 9 il müddətində azadlıqdan məhrum edilib. O, azadlıqdan məhrumetmə cəzasını ümumi rejimli cəzaçəkmə müəssisəsində çəkəcək.
Fidan İlqar
