Cəlilabad rayonunun Hacıməmmədli kəndində yaşayan 33 yaşlı Leyla Heydərovanın itkin düşməsi ilə bağlı yeni təfərrüatlar məlum olub.
Report.az xəbər verir ki, Biləsuvar rayonundan gəlin köçən Leyla üç uşaq anasıdır və yaxınlarının sözlərinə görə, o, son dövrlərdə ciddi psixoloji gərginlik keçirirmiş.
Ailənin verdiyi məlumata əsasən, Leyla 24 noyabr tarixində kəndi tərk edib. Həyat yoldaşı və ailə üzvləri qohum toyunda olduğu üçün evdə heç kəsin olmaması Leylanın çıxmasına imkan yaradıb. Hadisədən sonra ailə yerli hüquq-mühafizə orqanlarına müraciət edib.
Leylanın qaynatası gəlininin hazırda Biləsuvar rayonundakı qohumlarının evində olduğunu ehtimal edir.
Həmçinin Leylanın həyat yoldaşı üç uşağını da götürərək Bakıya köçüb və rəsmi boşanma üçün sənədlər hazırlamağa başlayıb.
Hadisə ilə bağlı araşdırmalar davam edir.
***
Cəlilabadda 33 yaşlı Leyla Heydərova 7 gündür itkin düşüb.
Cenublu.az xəbər verir ki, Hacıməmmədli kənd sakini, Heydərova Leyla Hikmət qızı noyabrın 24-ü yaşadığı evdən çıxıb və indiyədək qayıtmayıb.
Xanımın əlamətləri bunlardır: Boyu 170 sm, gözləri qəhvəyi rəngdədir. Evdən çıxan zaman əynində qara rəngli köynək, qara şalvar, ağ idman ayaqqabısı, boz rəngli gödəkçə olub.
Onun barəsində məlumatı olanlardan DİN-in "102" Xidməti Zəng Mərkəzinə, həmçinin Cəlilabad Rayon Polis Şöbəsinin 055-248-17-33 nömrəsinə zəng vuraraq məlumat vermələri xahiş olunur.
[caption id="attachment_71271" align="alignnone" width="260"]
Foto DİN[/caption]
