Yeni məktəblərin tikilib istifadəyə verilməsi daha çox şagirdin təhsil alma imkanlarını genişləndirir. Xüsusilə əhalinin sıx yaşadığı bölgələrdə bu addım uşaqların daha yaxşı təhsil mühitində yetişməsinə və keyfiyyətli bilik əldə etməsinə müsbət təsir göstərir. Bəs, görəsən, bu il Lənkəran-Astara Regional Təhsil İdarəsinin tabeliyində fəaliyyət göstərən ümumtəhsil müəssisələri üçün neçə yeni binanın tikintisi nəzərdə tutulur?
Lənkəran-Astara Regional Təhsil İdarəsindən azertag.az-a bildirilib ki, idarənin tabeliyindəki təhsil müəssisələrinin maddi-texniki bazasının gücləndirilməsi, müasir avadanlıqlarla təmin olunması, yeni binaların tikilməsi və mövcud binaların təmir edilməsi əsas prioritetləri arasındadır. Belə ki, idarənin tabeliyində 536 ümumtəhsil, 121 məktəbəqədər, 11 məktəbdənkənar təhsil müəssisəsi fəaliyyət göstərir.
Hazırda Lənkəran-Astara Regional Təhsil İdarəsi üzrə ümumilikdə 7 təhsil müəssisəsində cari, 5 təhsil müəssisədə əsaslı təmir işləri aparılır, eləcə də 18 təhsil müəssisəsində tikinti işləri (bina və qazanxana) icra edilir. Növbəti tədris ili üçün 80-ə yaxın təhsil müəssisəsində cari və əsaslı təmir işlərinin aparılması və tamamlanması planlaşdırılır. Bu tədris ilinin başlanğıcında 3 təhsil müəssisəsi - Masallı rayon Qəzvinoba kənd və Cəlilabad rayon Pərdi kənd ümumi orta məktəbləri tikilib, Lənkəran rayonu Çay fabriki qəsəbə tam orta məktəb üçün isə uyğunlaşdırılmış konteyner tipli bina istifadəyə verilib.
“Bu il isə Lənkəran rayonunun Viyən kənd, Astara rayonunun Sərək və Şümrüd kənd, Lerik rayonunun Cəngəmiran kənd məktəblərinin tikilib istismara verilməsi planlaşdırılır”, - deyə bildirilib.
Qeyd edək ki, idarə üzrə 60-a yaxın təhsil müəssisəsinin istilik sistemi qazla işləyən mərkəzləşdirilmiş istilik sistemi ilə əvəzlənib.
