Vətən uğrunda canlarından keçən şəhidlərimiz – Ülvi Nüsrətbəylinin, Əlimərdan Quluzadənin və Rövşən Eynullayevin ad günüdür.
Ülvi Arif oğlu Nüsrətbəyli 1999-cu il fevralın 14-də Masallı rayonunun Güllütəpə kəndində anadan olub.
O, 2020-ci ilin iyulundan Azərbaycan Silahlı Qüvvələrinin sıralarında müddətli həqiqi hərbi xidmətdə idi.
İkinci Qarabağ müharibəsi zamanı Füzulinin azadlığı uğrunda gedən döyüşlərdə savaşıb. Ülvi oktyabrın 12-də Füzulinin azad edilməsi zamanı şəhid olub. Masallı rayonunda dəfn olunub.
Ölümündən sonra “Vətən uğrunda” və “Füzulinin azad olunmasına görə” medalları ilə təltif olunub.
Əlimərdan Fəttah oğlu Quluzadə 1993-cü ildə Masallı rayonunun Birinci Yeddioymaq kəndində anadan olub.
2008-2011-ci illərdə Cəmşid Naxçıvanski adına hərbi liseydə, 2011-2015-ci illərdə Heydər Əliyev adına Azərbaycan Ali Hərbi Məktəbində təhsil alaraq leytenant rütbəsi alıb.
O, 2016-cı ildə uğurlu Aprel döyüşlərinin iştirakçısı olub.
Orduda nümunəvi zabit kimi xidmət göstərdiyinə görə 2013-cü ildə “Azərbaycan Respublikası Silahlı Qüvvələrinin 95 illiyi (1918-2013)” və 2018-ci ildə “Azərbaycan Ordusunun 100 illiyi (1918-2018)” yubiley medallarına layiq görülüb.
Vətən müharibəsi zamanı Füzulinin azadlığı uğrunda döyüşlərdə qəhrəmancasına döyüşüb. Oktyabrın 6-da Füzulidə gedən qanlı döyüşlər zamanı torpaqlarımızın ərazi bütövlüyü uğrunda qəhrəmancasına şəhid olub.
Şəhid Birinci Yeddioymaq kənd qəbiristanlığında izdihamla dəfn olunub. İki qız övladı yadigar qalıb.
Ölümündən sonra “Vətən uğrunda” və “Cəbrayılın azad olunmasına görə” medalları ilə təltif olunub.
Rövşən Elşən oğlu Eynullayev 2000-ci il fevralın 14-də Biləsuvar rayonunun Nərimankənd kəndində anadan olub.
Azərbaycan Silahlı Qüvvələrinin müddətdən artıq həqiqi hərbi xidmət qulluqçusu Rövşən Eynullayev 27 sentyabr 2020-ci il tarixdən başlayan Vətən müharibəsində iştirak edib, həmin ayın 29-da Cəbrayıl və Füzuli rayonları istiqamətində gedən döyüşlərdə düşmən hücumunun qarşısını alarkən qəhrəmancasına şəhid olub.
O, ölümündən sonra "Vətən uğrunda", "Füzulinin azad olunmasına görə" və “Döyüşdə fərqlənməyə görə” medalları ilə təltif edilib.
Allah şəhidlərimizə rəhmət eləsin!
