Bu gün Vətən müharibəsi şəhidi Masim Hafiz oğlu Qurbanovun dünyaya göz açdığı gündür.
Masim Qurbanov 2001-ci ildə yanvarın 7-si Masallı rayonunun Ərəb kəndində anadan olub. 2008-2017-ci illərdə Masallı rayonu Ərəb kənd tam orta məktəbində təhsil alıb. 2019-cu ilin yanvar ayından 2020-ci ilin iyul ayına kimi müddətli həqiqi hərbi xidmətdə olub.
Vətən müharibəsi zamanı Cəbrayıl, Füzuli, Zəngilan, Qubadlı istiqamətlərində gedən döyüşlərdə könüllü olaraq iştirak edib.
2020-ci ildə oktyabrın 30-u Qubadlı istiqamətində gedən döyüşlərdə şəhidlik zirvəsinə ucalıb. Şəhidin nəşi 10 yanvar 2021-ci il tarixdə doğulduğu Ərəb kənd qəbiristanlığında torpağa tapşırılıb.
Ölümündən sonra Qurbanov “Vətən uğrunda”, “Qubadlının azad olunmasına görə”, “Cəbrayılın azad olunmasına görə” və “Cəsur döyüşçü” medalları ilə təltif edilib.
Şəhid Masimin atası Hafiz Qurbanov Birinci Qarabağ müharibəsi döyüşlərinin iştirakçısı olub. O, II qrup Qarabağ müharibəsi əlilidir.
