Bu gün Cəlilabaddan olan şəhid Mirlətif Ağayevin xatirəsi anılır.
Mirlətif Ağayev 20 noyabr 1990-cı ildə Cəlilabad rayonunun Göytəpə şəhərində anadan olub. O, 2008-ci ildə Tibb Universitetinə daxil olub. 2013-cü ildə, ali təhsilini bitirəndən sonra hərbi xidmətə yollanıb.
Azərbaycan Ordusunun leytenantı olan hərbi-tibb qulluqçusu Mirlətif Ağayev Vətən müharibəsi zamanı Cəbrayılın və Qubadlının azadlığı uğrunda gedən döyüşlərdə yaralanan hərbçilərə yerindəcə yardım edib. 247 yaralı əsgəri, 20 şəhidi döyüş meydanından çıxarıb. Özü isə oktyabrın 26-da Qubadlı döyüşləri zamanı şəhid olub. 7 noyabr tarixində ata yurdu olan Ləkin kəndində torpağa tapşırılıb.
Şəhid Mirlətif Ağayev ölümündən sonra "Vətən uğrunda", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.
