Bu gün, 17 noyabr tarixində şəhid Kənan Hacıyevin anım günüdür.
Kənan İmran oğlu Hacıyev 2001-ci ildə Astara rayonunun Motlayataq kənd inzibati ərazi dairəsi olan Anbuba kəndində anadan olub. 2008-2019-cu illərdə S.Qurbanov adına Motlayataq kənd tam orta məktəbində təhsil alıb. 2019-cu ildə Bakı Biznes və Kooperasiya kollecinə daxil olub.
Kənan Hacıyev 2020-ci ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin “N” saylı hərbi hissəsində xidmət edib.
Vətən müharibəsi zamanı Füzuli və Xocavəndin azadlığı uğrunda gedən döyüşlərdə iştirak edib. 6 oktyabr 2020-ci ildə şəhidlik zirvəsinə ucalıb. Nəşi uzun müddət tapılmayıb. Onun şəhid olma xəbəri 9 noyabr tarixində təsdiqlənib. Astara rayonunun Anbuba kəndində torpağa tapşırılıb.
Ölümündən sonra “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif olunub.
