Bu gün, 28 sentyabr Azərbaycan Silahlı Qüvvələrinin əsgəri, müddətdən artıq xidmət edən hərbi qulluqçu, 2-ci Qarabağ müharibəsinin şəhidi Vüqar İbadovun mövlud günüdür.
Vüqar İbadov 1988-ci ildə Göytəpə şəhərində anadan olub. Əsgər 1994-2004-cü illərdə V.Hüseynov adına Göytəpə şəhər 2 saylı tam orta məktəbində təhsil alıb. Sonra Cəlilabad Peşə liseyində təhsilini davam etdirib.
O, 2006-2008-ci illərdə həqiqi hərbi xidmətdə olub. 2013-2016-cı illərdə N saylı hərbi hissədə fəaliyyətə başlayıb, müddətdən artıq həqiqi hərbi xidmət hərbi qulluqçularının hazırlığı kursunu keçərək işlədiyi müddətdə müxtəlif fəxri fərmanlarla mükafatlandırılıb.
İlk gündən torpaqlarımızın azad olunması uğrunda döyüşlərə qatılıb. Cəbrayılın, Füzulinin azadlığı uğrunda gedən döyüşlərdə igidlik göstərib və 2020-ci il oktyabrın 19-da şəhidlik zirvəsinə yüksəlib.
Qəhrəman ölümündən sonra “Vətən uğrunda”, "Cəbrayılın azad olunmasına görə", “Füzulinin azad olunmasına görə” və "Qubadlının azad olunmasına görə" medalları ilə təltif edilib.
