Bu gün, 8 dekabr tarixində qəhrəman şəhidimiz Raqib Əzizovun anım günüdür.
Azərbaycan Silahlı Qüvvələrinin giziri olan Raqib Vidadi oğlu Əzizov 29 avqust 1991-ci ildə Masallı rayonunun Yolağac kəndində anadan olub. 2009-2011-ci illərdə Azərbaycan Hərbi Dəniz Qüvvələrinin "N" saylı hərbi hissəsində müddətli həqiqi hərbi xidmətdə olub. 2012-2013-cü illərdə Azərbaycan Silahlı Qüvvələrinin TTM-də təhsil alan Raqib Əzizov, 2013-cü ilin aprelindən "N" saylı hərbi hissədə bağlama rabitə bölüyünün mobil retranslyasiya stansiyasının rəisi vəzifəsində xidmət edib.
Vətən müharibəsi zamanı Hadrut və Zəngilan uğrunda gedən döyüşlərdə iştirak edib. Müharibə başa çatdıqdan sonra Hadrut qəsəbəsi istiqamətində hərbi xidmətini davam etdirən Raqib Əzizov 8 dekabr tarixində Ermənistan Silahlı Qüvvələrinin qalıqlarından ibarət bir qrupun törətdiyi təxribatın qarşısını alarkən qəhrəmancasına şəhid olub.
Raqib Əzizov göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən, ölümündən sonra "Vətən uğrunda", "Xocavəndin azad olunmasına görə" və "Zəngilanın azad olunmasına görə" medalları ilə təltif edilib.
