Bu gün, 29 avqust tarixində Azərbaycan Silahlı Qüvvələrinin giziri, Vətən müharibəsi şəhidi Raqib Əzizovun mövlud günüdür.
Raqib Əzizov 1991-ci ildə Masallı rayonunun Yolağac kəndində anadan olub. 2009-2011-ci illərdə Azərbaycan Hərbi Dəniz Qüvvələrinin N saylı hərbi hissəsində müddətli həqiqi hərbi xidmətdə olub. 2012-2013-cü illərdə Azərbaycan Silahlı Qüvvələrinin TTM-ində təhsil alan Raqib Əzizov, 2013-cü ilin aprelindən N saylı hərbi hissədə bağlama rabitə bölüyünün mobil retransiyasiya stansiyasının rəisi vəzifəsində xidmət edib.
O, 27 sentyabr 2020-ci ildə başlayan Vətən müharibəsi zamanı Hadrut qəsəbəsinin və Füzulinin azadlığı uğrunda gedən döyüşlərdə savaşıb. Gizir Raqib Əzizov 8 dekabr Xocavənd rayonunun Hadrut qəsəbəsi istiqamətində qanunsuz erməni silahlı qrupu və ya ərazidə qalmış Ermənistan Silahlı Qüvvələrinin qalıqlarından ibarət bir neçə nəfərin törətdiyi təxribatın qarşısını alarkən qəhrəmancasına şəhid olub.
Ölümündən sonra "Vətən uğrunda", "Xocavəndin azad olunmasına görə" və "Zəngilanın azad olunmasına görə" medalları ilə təltif edilib.
