Bu gün, 2 oktyabr tarixində Dövlət Sərhəd Xidmətinin Sərhəd Qoşunlarının əsgəri, İkinci Qarabağ müharibəsi şəhidi Mürtaza Qasımovun mövlud günüdür.
Mürtaza Qasımov 2001-ci ildə Cəlilabad rayonunun Gülməmmədli kəndində anadan olub. Şəhid 2008-2019-cu illərdə Əli Kərimov adına Cəlilabad rayon Gülməmmədli kənd tam orta məktəbində təhsil alıb.
O, 2019-cu ilin oktyabr ayından Sərhəd Qoşunlarının müddətli həqiqi hərbi xidmət hərbi qulluqçusu olub. Vətən müharibəsi zamanı Qasımov Cəbrayılın və Zəngilanın azadlığı uğrunda gedən döyüşlərdə vuruşub və 8 noyabr 2020-ci ildə Zəngilan rayonu istiqamətində döyüş tapşırığının yerinə yetirilməsi zamanı şəhidlik zirvəsinə yüksəlib.
Qəhrəman 9 noyabr 2020-ci il tarixində Cəlilabad rayonunun Gülməmmədli kəndində dəfn edilib.
Ölümündən sonra “Vətən uğrunda”, "İgidliyə görə", "Zəngilanın azad olunmasına görə" və "Cəbrayılın azad olunmasına görə" medalları ilə təltif edilib.
