Bu gün, 21 sentyabr tarixində Azərbaycan Silahlı Qüvvələrinin baş giziri, İkinci Qarabağ müharibəsi şəhidi İntiqam Abbasovun mövlud günüdür.
İntiqam Abbasov 1978-ci ildə Masallı rayonunun Köcəkli kəndində anadan olub.
Qəhrəman 2016-cı il aprelin 1-dən 2-nə keçən gecədən Azərbaycan və Ermənistan Silahlı Qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində başlayan şiddətli döyüşlərdə sabaşıb. Döyüşlərdən bir il sonra, 2017-ci ildə İntiqam Abbasova baş gizir rütbəsi verilib.
Azərbaycan Ordusunun baş giziri olan İntiqam Abbasov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan İkinci Qarabağ müharibəsində tankçı olaraq iştirak edib. Füzulinin azadlığı uğrunda gedən döyüşlərdə vuruşub.
O, 29 sentyabr 2020-ci ildə Füzuli rayonu istiqamətində döyüş tapşırığının yerinə yetirilməsi zamanı şəhidlik zirvəsinə ucalıb.
Şəhid doğulduğu Masallı rayonunun Köcəkli kəndində dəfn olunub.
İntiqam Abbasov vətənə xidmət zamanı bir sıra medallarla təltif olunub: "Azərbaycan Silahlı Qüvvələrinin 90 illiyi", "Azərbaycan Silahlı Qüvvələrinin 95 illiyi", "Qüsursuz xidmətə görə" 3-cü dərəcəli medalı, "Azərbaycan Ordusunun 100 illiyi" və "Qüsursuz xidmətə görə" 2-ci dərəcəli medalı.
Ölümündən sonra “Vətən uğrunda”, "Füzulinin azad olunmasına görə" və "Hərbi xidmətlərə görə" medalları ilə təltif edilib.
