Bu gün, 25 oktyabr tarixində şəhid Hakim Həsənovun mövlud günüdür.
Hakim Cəmiyağa oğlu Həsənov 1973-cü ildə Masallı rayonunun Qasımlı kəndində anadan olub. 1990-cı ildə Yeddioymaq kənd orta məktəbini, 1991-ci ilin oktyabrında isə Bakı Dənizçilik Məktəbini bitirib. Hakim 1992-ci il iyulun 5-də Azərbaycan Milli Ordusun Qusar batalyonunda hərbi xidmətə başlayıb. Füzuli bölgəsində ermənilərə qarşı vuruşub, sentyabr ayında Qubadlı-Laçın bölgəsində gedən qızğın döyüşlərdə fəal iştirak edib, Muradxanlı, Güləbird, Aşağı Fərəcan, Yuxarı Fərəcan, Mavutulu, Səfiyan, Türklər kəndlərinin erməni quldurlarından təmizlənməsində böyük şücaət göstərib. Hakim Füzuli, Laçın, Qubadlı və Zəngilan bölgələrində onlarla yaralı və meyitin döyüş zonasından çıxarılmasına nail olub. Ona komandirlər tərəfindən qoçaqlığına və cəsurluğuna görə təşəkkür edilib, iki dəfə məzuniyyət verilib. Lakin o, döyüş yoldaşlarından ayrılmamış, məzuniyyətə getməkdən imtina edib.
Hakim 1993-cü il aprelin 5-də Laçın bölgəsinin Qızartı kəndini erməni qəsbkarlarından azad edərkən qəhrəmancasına həlak olub, Qasımlı kənd qəbiristanlığında dəfn edilib.
Qasımlı kənd orta məktəbinə Hakim Həsənovun adı verilib.
