Bu gün, 13 sentyabr tarixində Azərbaycan Silahlı Qüvvələrinin əsgəri, şəhid Cəmil Qurbanzadənin ildönümüdür.
Cəmil Qurbanzadə 27 aprel 2003-cü ildə Astara şəhərində anadan olub. Astara şəhər 2 saylı tam orta məktəbini bitirdikdən sonra, 2020-ci ildə Azərbaycan Dövlət İdman Akademiyasının qiyabi şöbəsinə daxil olub. 2021-ci ilin aprel ayında hərbi xidmətə yola düşüb.
Cəmil Qurbanzadə tərxis olmağına 18 gün qalmış şəhid olub. Onun nəşi 16 sentyabr 2022-ci ildə doğulub boya başa çatdığı Astara şəhərinə gətirilib, böyük bir izdihamla Astara şəhər qəbiristanlığında dəfn edilib. Dəfn mərasimində şəhidin qohum və yaxınları, rayon rəhbərliyi və sakinlər iştirak ediblər.
İlham Əliyevin 05.11.2022 tarixli Sərəncamına əsasən, ölümündən sonra 3-cü dərəcəli "Vətənə xidmətə görə" ordeni və "Vətən uğrunda" medalı ilə təltif olunub.
Qeyd edək ki, 12 sentyabr 2022-ci ildə gecə saatlarından etibarən Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib. Azərbaycan Ordusunun həyata keçirdiyi qətiyyətli cavab tədbirləri zamanı Ermənistan silahlı birləşmələrinin 450 nəfərədək canlı qüvvəsi məhv edilib. Müdafiə Nazirliyinin yaydığı məlumatlara əsasən, döyüşlər zamanı Silahlı Qüvvələrimizin ümumilikdə 80 hərbi qulluqçusu şəhidlik zirvəsinə ucalıb.
