Masallıdan olan Vətən müharibəsi şəhidləri Məhəmməd Əliyev və Cavad Babayevin anım günüdür. Bu haqda məlumatı Cenublu.az bu gün, 11 noyabr tarixində verir.
Məhəmməd Əliyev 9 yanvar 1999-cu ildə Masallı rayonunun Böyük Xocavar kəndində anadan olub. O, Vətən müharibəsi zamanı Füzulidən Şuşaya qədər gedən döyüşlərdə savaşaraq şəhid olub. Şəhidin nəşi 11 noyabr 2020-ci il tarixində doğulduğu Böyük Xocavar kənd qəbiristanlığında torpağa tapşırılıb.
Ölümündən sonra “Vətən uğrunda” medalı ilə təltif olunub.
Cavad Babayev 28 noyabr 1998-ci ildə Masallı rayonunun Qızılağac kəndində anadan olub. O, 11 noyabr tarixində Qubadlı uğrunda gedən döyüşlərdə iştirak edərkən şəhidlik zirvəsinə ucalıb. Şəhidin nəşi Qızılağac kənd qəbiristanlığında dəfn edilib.
Ölümündən sonra “Vətən uğrunda”, "Cəsur döyüşçü" , “Qubadlının azad olunmasına görə” və "Cəbrayılın azad olunmasına görə" medalları ilə təltif edilib.
