Bu gün, 4 noyabr tarixində Lənkəran Dövlət Universitetinin şəhid məzunu Fərid Əsgərovun anım günüdür.
Fərid Əsgərov 21 may 1996-cı ildə Neftçala rayonunun Qaçaqkənd kəndində hərbçi ailəsində anadan olub. Lənkəran Dövlət Universitetinin İngilis dili fakültəsində təhsil alıb. 2017-2018-ci illərdə Beyləqan ərazisindəki N saylı hərbi hissədə həqiqi hərbi xidmət keçib. Hərbi xidmətdən sonra Bakıda mühafizə idarəsində çalışıb. O, 44 günlük Vətən müharibəsinə könüllü olaraq qatılıb, 3 oktyabr tarixində cəbhəyə yollanıb. Füzuli, Cəbrayıl, Zəngilan, Qubadlı uğrunda gedən döyüşlərdə iştirak edərək igidliklər göstərib. 4 noyabr Qubadlı uğrunda gedən döyüşlərdə qəhrəmancasına şəhid olub.
Prezident İlham Əliyevin müvafiq sərəncamları ilə ölümündən sonra “Vətən uğrunda”, “Qubadlının azad olunmasına görə” və “Cəbrayılın azad olunmasına görə” medalları ilə təltif olunub.
