Cəlilabaddan olan Vətən müharibəsi şəhidləri Kamran Mirzəyev və Kənan Məmmədovun anım günüdür. Bu haqda məlumatı Cenublu.az bu gün, 5 yanvar tarixində verir.
Kamran Araz oğlu Mirzəyev 5 yanvar 1996-cı ildə Cəlilabad rayonunun Qarğılı kəndində anadan olub. 2013-cü ildə Rahib Rüstəmov adına Qarğılı kənd ümumi orta məktəbini bitirib. 2016-cı ilin yanvar ayında əsgərliyə gedib və 2017-ci ildə hərbi xidməti başa vurub.
27 sentyabr 2020-ci ildə başlanan Vətən müharibəsi zamanı Füzulinin azadlığı uğrunda gedən döyüşlərdə könüllü olaraq vuruşub. 26 oktyabr tarixində şəhidlik zirvəsinə ucalıb. Şəhidimiz Tovuz rayonunda dəfn olunub.
Kənan Tofik oğlu Məmmədov 5 yanvar 1995-ci ildə Cəlilabad rayonunun Məmmədrzalı kəndində dünyaya gəlib. Kənd orta məktəbində təhsil alıb.
27 sentyabr 2020-ci il tarixində başlayan İkinci Qarabağ müharibəsində iştirak edib. O, Suqovuşan uğrunda gedən döyüşlərdə şücaət göstərib və 21 oktyabr tarixində "Mübariz postu" adlandırılan postda şəhid olub.
