Bu gün, 21 noyabr tarixində Azərbaycan Respublikasının Əməkdar artisti Ruhəngiz Allahverdiyevanın doğum günüdür.
Rühəngiz Allahverdiyeva 1955-ci ildə Lənkəran şəhərində anadan olub. Orta məktəbi bitirdikdən sonra "Təranə gənclik" ansamblında müğənni kimi fəaliyyətə başlayıb. 1973-cü ildən başlayaraq əvvəl Filarmoniyada, daha sonra isə "Azkonsert" qastrol birliyində "Lalə" qızlar ansamblının solisti olub. O, keçmiş SSRİ məkanının bir çox şəhərlərində, xarici dövlətlərdə, o cümlədən Türkiyədə, Almaniyada, Macarıstanda, Vyetnamda, Əfqanıstanda qastrol səfərlərində olaraq, Azərbaycan musiqi mədəniyyətini uğurla təmsil edib.
Hazırda Azərbaycan Dövlət Televiziya və Radio Qapalı Səhmdar Cəmiyyətinin solistidir. 15 may 2006-cı ildə Azərbaycan Respublikasının Əməkdar Artisti fəxri adına layiq görülüb.
