Bu gün astaralı Samrad Eynəliyevin, lənkəranlı Murad Hüseynzadənin və Masallıdan olan Əlisa Əliyevin anadan olduqları gündür.
Samrad İkramoğlu Eynəliyev 2005-ci il yanvar ayının 8-də Astara rayonu Pəlikəş kəndində anadan olub. Orta təhsilini Xanlar Şəkərov adına Tüləküvan kənd tam orta məktəbində alıb.
Samrad Eynəliyev Azərbaycan Respublikasının Silahlı Qüvvələri tərəfindən 20 sentyabr 2023-cü il tarixində həyata keçirilmiş uğurlu lokal antiterror tədbirləri zamanı Xocavənd istiqamətində gedən döyüşlərdə şəhid olub.
O, "Vətən uğrunda” medalı və 3-cü dərəcəli “Vətənə xidmətə görə” ordeni ilə təltif edilib.
Murad Mahmud oğlu Hüseynzadə 1998-ci ildə Lənkəran rayonunun Şağlaser kəndində anadan olub. Orta təhsilini Lənkəran rayon A.Əsədullayev adına Şağlaser kənd ümumi orta məktəbində alıb. Hərbi xidmətini başa vurduqdan sonra, Lənkəran Rayonlararası Narkoloji Xəstəxanasında işləməyə başlayıb.
2016-cı ildə Aprel döyüşlərinin iştirakçısı olan Murad Vətən müharibəsinə də könüllü olaraq yola düşüb. O, 21 oktyabr Qubadlının Muradxanlı kəndi istiqamətində gedən döyüşlərdə ayağından yaralanıb, lakin hospitala getməkdən imtina edib və döyüşə davam edib. Murad 31 oktyabr Laçın istiqamətində gedən döyüşlərdə şəhidlik zirvəsinə ucalıb. Onun nəşi neytral zonada qaldığından çıxarılması bir müddət mümkün olmayıb.
Murad Hüseynzadə ölümündən sonra “Cəbrayılın azad olunmasına görə”, “Qubadlının azad olunmasına görə” və “Vətən uğrunda” medalları ilə təltif olunub.
Əslən Masallıdan olan Əlisa Əliyev 2000-ci ildə Masallının Qızılağac kəndində anadan olub. Vətən müharibəsində bir çox hərbi əməliyyatlarda iştirak edərək, Füzuli, Cəbrayıl, Hadrut, Xocavənd və Şuşa uğrunda gedən döyüşlərdə şücaətlə vuruşub. 6 noyabr Şuşa istiqamətində gedən döyüşlərdə, düşmən mərmisinin partlaması nəticəsində qəhrəmancasına şəhid olub.
Ə.Əliyev ölümündən sonra “Vətən uğrunda”, “Şuşanın azad olunmasına görə”, “İgidliyə görə”, “Xocavəndin azad olunmasına görə” medalları ilə təltif olunub.
