Sərək kəndi Astara şəhərindən 10 km şimal-qərb istiqamətində, dağətəyi ərazidə yerləşir.
Toponim talış dilində “Sək” kimi tələffüz olunur. Bir çox təqdiqatçların fikrincə, kəndin adı sak tayfasının adı ilə əlaqəlidir.
Bəzi mənbələrdə yaşayış məntəqəsinin adını zərəng (qızılı rəngli) adlanan ağac növü ilə bağlayırlar. Buna səbəb isə yaşayış məntəqəsinin ərazisində çox sayda qızılı rəngli yarpaqları olan dəmirağacın olmasıdır.
Rus alimi Boris Vsevolodoviç Miller 1925-ci ildə Lənkəran qəzasına səyahət edərkən Sərək kəndi haqqında yazıb. Onun sözlərinə görə, kənddə özlərini talış hesab edən köçəri tayfa olan çarojların nümayəndələri yaşayırlar. Onlar buraya İranın Talışdolab mahalından gəliblər. Tayfanın qışlaqları Təngərud kəndində, yaylaqları isə Toradi kəndinin dağlıq ərazisində yerləşir.
Kənddə Hacı Əfqan Şərif, Pir övliyya, Pir Məryəm, Pyəjeni tıbə, Nilərzunə tıbə, Kranqo du tıbə, Şəm, Çil övliya (qırx övliya) və digər ziyarətgahlar mövcuddur.
Əhali, əsasən, sitrusçuluq və əkinçiliklə məşğuldur.
1915-ci ilə aid olan siyahıyaalınma məlumatına görə, Sərək kəndində 267 nəfər yaşayıb. 2009-cu ilin statistik göstəricilərinə əsasən, bu kənddə 1688 nəfərin yaşadığı qeyd olunub.
