BMT-nin Ərzaq və Kənd Təsərrüfatının (FAO) texniki işlər üzrə aparıcı mütəxəssisi Peter Pechacek və beynəlxalq ekspert James Jackelman Astaraya səfər ediblər. Bu haqda məlumatı Cenublu.az bu gün, 30 sentyabr tarixində Astara rayon İcra Hakimiyyətinə istinadən verir.
Səfər zamanı o, rayon icra hakimiyyətinin başçısı Qəzənfər Ağayevlə görüşüb. Qonaqları Hirkan Milli Parkının nümayəndəsi müşayiət edib.
Səfərin məqsədi BMT-nin Ərzaq və Kənd Təsərrüfatının (FAO) Azərbaycan Respublikasının Ekologiya və Təbii Sərvətlər Nazirliyi ilə birgə sazişi çərçivəsində həyata keçirilən “Biomüxtəlifliyin mühafizəsi və davamlı istifadəsi: İdarəetmənin təkmilləşdirilməsi yolu ilə Azərbaycanın xüsusi mühafizə olunan ərazilər sisteminin gücləndirilməsi” layihəsinin icrasıdır.
Rayon icra hakimiyyətinin başçısı bildirib ki, Hirkan Milli Parkının 18 min hektarı Astara rayonunun ərazisində yerləşir. Digər qoruq və parklardan fərqli olaraq, burada nadir flora və fauna zənginliyi var. Burada mövcud olan bitki və heyvan növlərinin bir çoxu Azərbaycan Respublikasının “Qırmızı Kitabı”na daxil edilərək qorunur. Milli Parkın ərazisi unikal təbiəti ilə seçildiyindən turistlər üçün də çox cəlbedicidir. Həmçinin o, təklif olunan layihənin icrasının Hirkan Milli Parkında mövcud olan ekosistemin qorunmasında əhəmiyyətini nəzərə alaraq, bu sahədə qarşılıqlı işgüzar əlaqələrin qurulmasında köməklik göstərəcəyini əlavə edib.
Qonaqlar isə öz növbələrində Astaranın Azərbaycanın çox gözəl və səfalı guşəsi olduğunu vurğulayıblar və layihə çərçivəsində görülən və görüləcək işlər barədə məlumat veriblər. Həmçinin Hirkan Milli Parkının ərazisində məskunlaşmış sakinlərin imkanlarından buradakı bitki və heyvanlar aləminin qorunmasında istifadənin mümkünlüyündən danışaraq, əməkdaşlığın genişləndirilməsi və gələcəkdə həyata keçiriləcək digər tədbirlər barədə veriləcək təkliflərin müsbət həlli üçün çalışacaqlarını bildiriblər.
