Ötən ilin avqust ayında Biləsuvar rayon Məhkəməsinə boşanmaq məqsədilə müraciət edən Z.Abdulovun cinayət əməli üzə çıxıb.
Cenublu.az xəbər verir ki, 2000-ci il təvəllüdlü Biləsuvar sakini Z.Abdulovun nikaha daxil olduğu qadınla hələ yetkinlik yaşına çatmadığı dövrdə intim münasibətdə olduğu məlum olub.
Məhkəmə onların övladlarının yaşını nəzərə alaraq, cütlüyün qanunla qadağan edilmiş yaş həddində nikaha girdiyini aşkarlayıb və bu barədə polisə məlumat verilib.
Faktla bağlı Z.Abdulov barəsində Cinayət Məcəlləsinin 152.1-ci maddəsi ilə (16 yaşına çatmayan şəxslə cinsi əlaqədə olma) cinayət işi başlanıb. Bu dövrdə Z.Abdulov həyat yoldaşından boşanıb və keçmiş xanımı cinayət işi üzrə zərərçəkmiş şəxs kimi tanınıb.
Yanvarın 21-də Biləsuvar rayon məhkəməsi Z.Abdulovu 6 ay müddətinə həbs cəzasına məhkum edib.
