Biləsuvar rayonunda 1982-ci il təvəllüdlü Mahir şəxsi münasibətlər zəminində yaranan mübahisə zamanı həyat yoldaşı Mədinəyə (adlar şərti göstərilib – red.) xəsarət yetirib.
Demokrat.az məlumat verir ki, hadisə 7 sentyabr 2024-cü ildə Biləsuvar rayonunun kəndlərindən birində baş verib.
Yaşadıqları evin həyətində Mahirin arvadı Mədinə ilə onun atasının yas mərasimindən iş yerinə iclasa getməsi səbəbi ilə mübahisə düşüb.
Mahir mübahisə zamanı Mədinəni yerdən götürdüyü daşla kürək nahiyəsindən vuraraq ona müxtəlif dərəcəli bədən xəsarətləri yetirib.
Hadisəni törədən Mahirin barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Mahir ona elan olunmuş ittiham üzrə özünü təqsirli bilib.
O, ifadəsində göstərib ki, 2005-ci ildə Mədinə ilə ailə həyatı qurub:
“Bizim 3 övladımız var. Əvvəllər ailə münasibətlərimiz yaxşı olub. Son 3-4 aydır ki, aramızda mübahisələr olurdu. Sonuncu dəfə atamın hüzr vaxtı yoldaşım işi ilə əlaqədar Salyan rayonuna iclasa getmək istədi. Mən yoldaşıma icazə verməsəm də, o, həmin iclasa getdi. İclasdan qayıdandan sonra evə gedərək ona iclasa getməsinə görə əsəbiləşdim. Aramızda mübahisə baş verdiyindən yoldaşım bir az aralıda durarkən həyətdən daşı götürdüm, ona tərəf atdım. Daş yoldaşımın kürəyinə dəydi. Sonra həyətdən uzaqlaşaraq atamın hüzr yerinə getdim. Lakin hazırda əməlimdən peşmançılıq hissi keçirirəm. Buna görə də Mədinədən üzr istəyirəm. Ona dəymiş ziyanı aradan qaldırmışam, barışığa nail olmuşam”.
Bu cinayət işinə Biləsuvar Rayon Məhkəməsində baxılıb.
Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasının nəzərə alıb. Bu səbəbdən Mahirin barəsində olan cinayət təqibinə xitam verilib.
O, cinayət məsuliyyətindən azad edilib.
