Biləsuvar rayonunda ər-arvad arasında yaranan ailə-məişət mübahisəsi cinayətlə nəticələnib.
Demokrat.az-ın əldə etdiyi məlumata görə, hadisə ötən ilin iyulun 23-də rayon mərkəzində, H.Əliyev küçəsində yerləşən fərdi yaşayış evində baş verib. 1991-ci il təvəllüdlü Ayaz həyat yoldaşı Süsənlə (adlar şərtidir – red.) mübahisə zamanı onu döyərək müxtəlif dərəcəli bədən xəsarətləri yetirib.
İstintaqla müəyyən edilib ki, tərəflər arasında mübahisə ailənin üzərinə düşən maddi yük — mənzil almaq üçün götürülmüş bank kreditinin və digər borcların ödənilməsi, həmçinin qadına məxsus 0,75 hektar pay torpağının satılması məsələsi ilə bağlı yaranıb. Ayaz bu təkliflə razılaşmadığı üçün münaqişə kəskinləşib.
Ayaz arvadının sifət və bədəninin müxtəlif nahiyələrinə yumruq və şillə zərbələri endirib, qolunu burub. Zərərçəkmiş qadın hadisədən sonra polisə müraciət edib.
Ayaz Cinayət Məcəlləsinin 128-ci maddəsi ilə təqsirləndirilib və məhkəmədə özünü təqsirli bilib.
Cinayət işinə Biləsuvar Rayon Məhkəməsində baxılıb. Məhkəmənin hökmü ilə Ayaza 360 saat ictimai işlər cəzası təyin edilib.
