Masallı rayonunda 23 yaşlı oğlan dərzi sexində yetkinlik yaşına çatmayan qıza təcavüz etməkdə təqsirli bilinib.
Hadisə 31 oktyabr 2023-cü ildə baş verib.
Zərərçəkmiş 14 yaşlı Aylanın sözlərinə görə, o, anasının şalvarını götürmək üçün dərzi sexinə gedib. Ona qarşı əxlaqsız hərəkətlərdə ittiham olunan Şirvan adlı dərzi köməkçisi onu içəri otağa çağırıb, qız isə onun çılpaq vəziyyətdə olduğunu görüb. “Şirvan şalvarlardan hansının anama məxsus olduğunu soruşdu və ona yaxınlaşmağımı istədi. Şalvarlara dəqiq baxmaq üçün qapıdan içəriyə girdim, bir qədər ona yaxınlaşdım, sağ əlindəki şalvarın anama məxsus olmasını dedim. O, əlindəki şalvarları divarda olan asılqana asdı və sağ əli ilə cəld şəkildə biləyimdən tutdu,” - deyə o, bildirib.
Təlaş içində sexi tərk edərək evə qaçan Ayla baş verənləri anasına danışıb. Ailə polisə müraciət edib və Şirvan saxlanılıb.
Şirvan məhkəmədə özünü təqsirli bilmədiyini, qızın dediklərini inkar etdiyini söyləyib.
Lənkəran Ağır Cinayətlər Məhkəməsi əvvəlcə onu 16 il azadlıqdan məhrum etmişdi. Lakin apellyasiya mərhələsində hökm dəyişdirilib – Şirvanın əməli Cinayət Məcəlləsinin 153.2-ci maddəsi (on dörd yaşına çatmayan şəxsə qarşı əxlaqsız hərəkətlər) ilə tövsif olunub və o, 4 il 6 ay azadlıqdan məhrum edilib. Cəzasını ümumi rejimli cəzaçəkmə müəssisəsində çəkilməsi qərara alınıb.
Qeyd edək ki, zərərçəkmiş qızın adı şərtidir.
