Qida əlavələrinin reseptə yazılmasına görə cərimələr artırılır. Bununla bağlı İnzibati Xətalar Məcəlləsinə dəyişiklik təklif edilir. Layihəyə əsasən, bioloji aktiv qida məhsullarının reseptə yazılmasına görə vəzifəli şəxslər 100 manatdan 150 manatadək məbləğdə, hüquqi şəxslər 300 manatdan 400 manatadək məbləğdə cərimə ediləcək.
Hazırda bioloji fəallığa malik qida əlavələrinin həkim reseptinə yazılmasına görə vəzifəli şəxslər 50 manatdan 100 manatadək məbləğdə, hüquqi şəxslər 150 manatdan 200 manatadək məbləğdə cərimə edilir.
Səhiyyə Nazirliyi Analitik Ekspertiza Mərkəzinin Əczaçılıq müfəttişliyi şöbəsinin müfəttişi Mahmud Yusifov İqtisadiyyat.az-a açıqlamasında bildirib ki, mövcud qanunvericiliyə əsasən, resept elektron formada tərtib olunur və bu zaman xəstəliyin diaqnozu göstərilməlidir.
Onun sözlərinə görə, diaqnozu müəyyən edilmiş xəstəliyin müalicəsi üçün yalnız dərman vasitələrindən istifadə oluna bilər: “Bioloji aktiv qida məhsulları xəstəliyin müalicəsində istifadə olunmur və onlar yalnız dəstəkləyici əhəmiyyət daşıyır. Hazırda Azərbaycanda elektron resept sistemi tətbiq olunur və bu faktor nəzarəti gücləndirməyə imkan verir. Nəzərinizə çatdırmaq istəyirik ki, Səhiyyə Nazirliyinin tabeliyindəki bütün qurumlar elektron resept sisteminə keçid ediblər. Apteklərdə məhsullar çeşidi genişdir və yalnız dərman vasitələri ilə məhdudlaşmır. Bu o demək deyil ki, aptekdə satılan hər məhsul reseptə yazıla bilər”.
M.Yusifov vurğulayıb ki, reseptin yazılması tibbi prosedurun bir parçasıdır: “Aptek isə sahibkarın öz hüquqları daxilindədir. Dövlət orqanlarına hüquqi və fiziki şəxslər tərəfindən daxil olan müraciətlər əsasında, habelə tərəfimizdən aparılan yoxlamalarda bioloji aktiv qida məhsullarının reseptlərə yazılması halı aşkar edilərsə, bu zaman protokol tərtib olunur. Səhiyyə Nazirliyi vasitəsilə tərtib edilmiş protokollar məhkəmə orqanlarına göndərilir. Bir daha vətəndaşlara səslənirik ki, belə halla rastlaşdıqları təqdirdə Analitik Ekspertiza Mərkəzinin bir pəncərə sektoruna (pharma.az) və ya qaynar xəttinə müraciət edə bilərlər”.
