Astara rayonu ərazisində yerləşən Divəkə (və ya Əlişa) qalasında qazıntı işlərinə start verilib. Bu haqda məlumatı Cenublu.az bu gün, 2 oktyabr tarixində APA-ya istinadən verir.
Qazıntılar zamanı Azərbaycan tarixinə dair yeni faktlar verəcək maddi-mədəni nümunələr – çoxlu sayda saxsı qab qalıqları, şirli və şirsiz qab qırıqları, fayans tipli qab qalıqları, eyni zamanda miniatür tipli saxsı qablar aşkarlanıb.
Abidədə xüsusi diqqəti çəkən şir başı təsvir olunan daş parçası olub. Daşın üzərinə diqqətlə baxdıqda şir təsvirinin daşın müxtəlif tərəflərində əks olunduğunu görmək mümkündür.
Qalanın qazıntı aparılan hissəsində qırmızı kərpicdən hörülən hissənin tağ formasında olduğu və su axını üçün yerin olduğu da müəyyən olunub. Burada qayaların dibindən suyun tökülməsi və ya axıdılması üçün su tüngləri görmək mümkündür. Qazıntı zamanı ərazinin daha çox orta əsrlər dövrünə aid olduğu bildirilib.
Aparılan arxeoloji tədqiqatlar nəticəsində əldə olunan maddi-mədəni nümunələr göstərib ki, memarlıq abidəsi Təbriz memarlıq məktəbinin ən böyük nümunələrindəndir. Hansı ki XIII əsrdən etibarən Azərbaycan mədəni mərkəzlərinin biri Təbriz olduğundan məhz Elxanilər dövründən başlayır.
Abidənin cənuba doğru istiqamətində tikinti qalığı da mövcuddur ki, həmin tikinti qalığı yaşayış yerinə bənzəyir. İnstitut əməkdaşları yaxın zamanda həmin tikinti qalığında qazıntı işlərinə başlayacaqlar. Ehtimal olunur ki, tikinti ərazisindən tapılacaq materiallar Azərbaycan tarixinə dair yeni faktlar, daha dəqiq məlumatlar verəcək.
