Astarada faciə baş verib. Rayonun Dolu kəndindən olan 2008-ci il təvəllüdlü Əfsanə İmanova toy gecəsi dünyasını dəyişib. Məlum olub ki, 17 yaşlı yeniyetmə 7 aylıq hamilə imiş. Bəzi ilkin məlumatlara əsasən, o, uşağını toydan öncə itirib. Digər mənbələr iddia edir ki, Əfsanə özünü toy zamanı pis hiss edib. Onu xəstəxanaya çatdırıblar, müayinə zamanı isə dölün öldüyü aydınlaşıb. İstənilən halda, ailələrin tələm-tələsik toy etmələrinə səbəb məhz Əfsanənin hamiləliyi olub.
Ən dəhşətlisi budur ki, cəmiyyətimiz artıq bu cür xəbərlərə, bu cür faciələrə təəccüb etmir. 1-2 gün danışılacaq, müzakirə ediləcək – vəssalam. Gündəmi bir başqa məsələ zəbt edəcək. O qızcığazın bəd taleyi isə yaddaşlardan silinəcək. Ta növbəti analoji faciəyə qədər. Bəlkə onda kimsə 17 yaşlı nakam Əfsanəni xatırlasın. Belə, statistikanın bir parçası, ya da pis nümunə kimi. Vəssalam. Necə deyərlər, filmin sonu. Əslində isə, bu film belə bitməməlidir. Daha doğrusu, sonu belə olmamalıdır.
Əlbəttə, hüquq mühafizə orqanları Astaradakı faciəni araşdıracaq, hadisələrin əsl mahiyyəti üzə çıxacaq. Əminik ki, müqəssirlər də cəzalarını alacaq. Ancaq bu hadisənin Azərbaycanda sonuncu olacağına kim zəmanət verir? Zəmanət verən olsa da, etiraf edək – buna heç kim inanmayacaq. Çünki problemin kökləri çox dərindədir. Hər belə hadisənin öz xüsusiyyətləri, öz özəllikləri var. Amma onların hamısını birləşdirən bir amil də mövcuddur – valideyn laqeydliyi, valideyn səhlənkarlığı, valideynlərin üzərlərinə düşən valideyn funksiyalarını layiqincə yerinə yetirməməsi. Zənnimzcə, belə nakam həyat yaşayan qızların dünyaya gəlməsinin səbəbkarları daha ciddi cəzalara məruz qalmalı, onların cavabdeh qismində cəlb olunduqları məhkəmələr bütün media vasitələri ilə geniş işıqlandırılmalıdır. Artıq ictimai qınaq mərhələsini çoxdan geridə qoymuşuq. Real insanlar, real talelər məhv olur, daha nə qınaq? Əməli, sərt tədbirlər görülməlidir. Heç kim də mənəvi tənəzzül yaşayan cəmiyyətimizi bəhanə etməsin. Biveclər və şərəfsizlər həmişə olub və olacaq da, az ya çox. Kimsə fahişə, Kazanova, əyyaş, tüfeyli həyatı yaşamaq istəyirsə - canı cəhənnəmə! Yaşasın! Özü yaşasın, özünü məhv etsin. Amma əks cinslə heyvani instinktlərini, cuşa gələn ani ehtiraslarını yatırmaq məqsədi ilə əlaqəyə girib dünyaya uşaq gətirib onu bədbəxt etməsinlər! Əgər belə hal baş veribsə də, müvafiq dövlət qurumları bu tipləri zamanında müəyyən edərək valideynlik hüququndan məhrum etməli, məsum, gələcəyi qaranlıq olan tifillərin həyatını qurtarmalıdırlar. Yoxsa 17 yaşlı Əfsanə kimi hələ çox yeniyetmələr faciəvi əfsanə qəhrəmanlarına çevriləcəklər.
