Daha öncə Astara rayonunun Kakalos kəndində yetkinlik yaşına çatmamış qızın nişanlanması barədə məlumat vermişdik.
Məsələ ilə bağlı DİN-in mətbuat xidmətinin Lənkəran regional qrupundan Cenublu.az-a bildirilib ki, ailənin yaşadıqları evdə 16 yaşı tamam olmuş həmin qızın gələcəkdə ailə qurmasına razılıq verilməsi münasibətilə yığıncaq təşkil etmək istəmələri ilə bağlı polisə və Rayon İcra Hakimiyyəti yanında Yetkinlik Yaşına Çatmayanların İşləri və Hüquqlarının Müdafiəsi üzrə Komissiyaya məlumat daxil olub.
Dərhal Astara Rayon Polis Şöbəsinin əməkdaşları və komissiyanın sədri sözügedən ünvanda olublar və qızın valideynləri ilə izahedici söhbətlər aparılıb, qanunvericiliyin tələbləri onlara izah edilib. Valideynləri isə övladlarının hazırda onlarla birlikdə yaşadığını, yalnız 18 yaşı tamam olduqdan sonra toyun keçiriləcəyini bildiriblər. Sözügedən məsələ mütəmadi şəkildə diqqətdə saxlanılacaq.
Qeyd edək ki, yetkinlik yaşına çatmamış qızın toyunun 2024-cü ilin mart ayında olması planlaşdırılmışdı.
