Astara rayonunda sel suları nəticəsində yaranan problemlərin aradan qaldırılması istiqamətində işlər aparılır. Bu haqda məlumatı Cenublu.az bu gün, 19 sentyabr tarixində AZƏRTAC-a istinadən verir.
Rayon Fövqəladə Hallar Komissiyasının sədri, Astara Rayon İcra Hakimiyyətinin birinci müavini Allahverən Mahmudov bildirib ki, Vaqo körpüsünün uçması nəticəsində 15 minlik əhalinin rayonla əlaqəsi kəsilib.
Vətəndaşların rahat hərəkətini təmin etmək üçün “Azəravtoyol” ASC tərəfindən ərazidə müvəqqəti piyada körpüsü inşa olunub.
“Dağılmış körpünün yerində uzunluğu 25 metr, eni isə 10 metr olacaq yeni körpünün inşası nəzərdə tutulur. Bununla bağlı Nazirlər Kabinetinə və aidiyyəti qurumlara məlumat verilib. Səhər güclü yağan yağış nəticəsində Astara kiçik su elektrik stansiyasının su anbarı üçün partlama təhlükəsi yaranıb. Su bəndin üst hissəsində, təqribən 2 metr hündürlükdə daşmaqda idi. Hazırda yağış yağmadığı üçün suyun səviyyəsi aşağı düşüb”, – deyə İcra Hakimiyyəti başçısının birinci müavini bildirib.
Ucqar dağ kəndlərində torpaq sürüşmələri nəticəsində bir neçə kəndi birləşdirən yol bağlanıb. Əraziyə texnikalar cəlb edilərək yol birtərəfli açılıb.
