Astara Dövlət Rəsm Qalereyasının təşəbbüsü ilə Heydər Əliyev Mərkəzində Azərbaycan Rəssamlar İttifaqının üzvü Firudin Quliyevlə görüş keçirilib. Bu haqda məlumatı Cenublu.az bu gün, 1 dekabr tarixində verir.
Görüşdə rəssamın ailə üzvləri, yaxınları, sənət yoldaşları və tələbələri iştirak ediblər. Görüş zamanı rəssamın həyat və yaradıcılığı haqqında tədbir iştirakçılarına geniş məlumat verilib və çəkdiyi rəsm əsərlərindən ibarət sərgiyə baxış keçirilib.
Qeyd edək ki, rayonda rəssamlıq sənətini yaşadan və təbliğ edən istedadlı rəssam Firudin Mövsüm oğlu Quliyevin son illərdə islami dəyərlər mövzusunda “Qurani Kərim”in əksər surələrinə çəkdiyi rəsm əsərləri Respublika sərgisində nümayiş etdirilmiş, yaratdığı nadir əsərlər tamaşaçı tərəfindən böyük maraqla qarşılanmışdır.
Firudin Quliyev Azərbaycan Respublikasının Mədəniyyət Nazirliyi tərəfindən “Fəxri Mədəniyyət İşçisi” döş nişanına, Lüksemburq İncəsənət yarışmasında “Bədii Ləyaqət Sertifikatı”na layiq görülüb.
