Astara Dövlət Rəsm Qalereyasının dərnək üzvləri doğum günündə rəssam Firudin Quliyevlə görüşüblər. Bu haqda məlumatı Cenublu.az bu gün, 7 sentyabr tarixində verir.
Görüş çərçivəsində onlar rəssamın emalatxanasında olublar. Firudin Quliyev gənc rəssamlara sənətin sirləri haqqında tövsiyələr verib. Sonra milli rəssamlıq sənətinin inkişafı və təbliği ilə bağlı fikir mübadiləsi aparılıb.
Gənc rəssamlar 76 yaşını qeyd edən Firudin Quliyevi təbrik edərək, ona yeni yaradıcılıq uğurları arzulayıblar.
Qeyd edək ki, 1947-ci ildə Astarada doğulan Firudin Quliyev ölkəmizi bir çox beynəlxalq müsabiqələrdə təmsil edərək müxtəlif mükafatlara, 2018-ci ildə isə “Əməkdar mədəniyyət işçisi” fəxri adına layiq görülüb.
