Astara rayon İcra Hakimiyyətinin başçısı Qəzənfər Ağayev Hamoşam kənd inzibati ərazi dairəsi üzrə nümayəndəliyinə daxil olan Toradi kəndində əhali ilə səyyar qəbul-görüş keçirib. Bu haqda məlumatı Cenublu.az bu gün, 7 oktyabr tarixində Astara RİH-yə istinadən verir.
Görüş zamanı icra başçısı qeyd edib ki, Toradi kəndinin timsalında ucqar dağ kəndlərinə asfalt yolların çəkilməsi, müasir tipli məktəb binası, xəstəxananın inşa edilməsi, körpülərin salınması, elektrik xətt təsərrüfatının yenilənməsi ölkəmizin yüksək inkişafının, vətəndaşların sosial problemlərinin həllinə yönəldilən diqqət və qayğının nümunəsidir.
Sakinlər isə öz növbələrində rayon mərkəzindən xeyli uzaqda, dağlıq ərazidə yerləşən, ən ucqar kəndlərə asfalt yolun çəkilməsi ilə ən mühüm problemlərin həllini tapdığını söyləyiblər. Onlar asfaltlanan Taxtanakəran-Toradi avtomobil yolunun sakinlərə böyük töhfə olduğunu bildiriblər.
Qeyd edək ki, hazırda rayonda işığı, yolu olmayan kənd yoxdur. İlin bütün fəsillərində rayonun bütün yaşayış məntəqələrini rahatlıqla gəzmək mümkündür.
