Astarada Məscidməhəllə kənd məscidinin 43 yaşlı imamı dini mərasim zamanı yol verilən qayda pozuntusuna görə cərimələnib.
Axar.az xəbər verir ki, araşdırma zamanı məlum olub ki, imamın rəhbərlik etdiyi məclisdə 5 yaşlı uşaq da iştirak edib. Bu səbəbdən onun barəsində İnzibati Xətalar Məcəlləsinin 515.0.3-cü maddəsi üzrə – dini ayinlərlə bağlı olmayan uşaq və gənclər üçün xüsusi yığıncaqların təşkili qaydasının pozulmasına görə – inzibati protokol tərtib olunub.
Məhkəmə imamın və protokolu tərtib edən şəxsin ifadələrini, eləcə də sübutları araşdıraraq qayda pozuntusunu təsdiqləyib.
Astara Rayon Məhkəməsinin qərarı ilə kənd məscidinin imamı 1500 manat məbləğində cərimə olunub.
