Astarada “Hüququmuzu bilirik” və “Bullinqə yox deyirik” mövzularında seminar təşkil olunub. Bu haqda məlumatı Cenublu.az bu gün, 15 noyabr tarixində verir.
Şıxəli Qasımov adına Astara şəhər 4 saylı tam orta məktəbində baş tutan tədbirdə Lənkəran-Astara Regional Gənclər və İdman İdarəsinin Astara rayon gənclər və idman sektorunun, Astara rayon Təhsil sektorunun əməkdaşları, müəllim və şagirdlər iştirak ediblər.
Çıxışlarda uşaq hüquqlarının qorunması, bullinqin qarşısının alınması barədə ətraflı məlumat verilib, eyni zamanda Gənclər və İdman İdarəsi tərəfindən keçirilən gənclərlə iş və idman sahəsində qazanılan nailiyyətlərdən söhbət açılıb. Bununla yanaşı, yeniyetmə və gənclərin hüquqi maarifləndirilməsi, onların mənəvi və fiziki cəhətdən sağlam və harmonik inkişafa nail olmasının vacibliyi bir daha vurğulanıb.
Qeyd edək ki, tədbir Lənkəran-Astara Regional Gənclər və İdman İdarəsinin Astara rayon gənclər və idman sektoru, Astara rayon Təhsil sektoru ilə birgə “Uşaq hüquqları aylığı” çərçivəsində baş tutub.
