Astaranın Şümrüd kəndində 2 il əvvəl torpaq sürüşməsi nəticəsində evləri qəzalı vəziyyətə düşmüş sakinlər üçün fərdi evlər tikilir. Bu haqda məlumatı Cenublu.az bu gün, 8 oktyabr tarixində ARB Cenub-a istinadən verir.
Belə ki, evlərin tikintisinə 1.648.200 manat vəsait ayrılıb. Tikintisi sürətlə aparılan evlərin bir neçə aya təhvil verilməsi nəzərdə tutulub.
2 il əvvəl torpaq sürüşməsinə məruz qalan Şümrüd kəndində 9 hektara yaxın ərazidə proses ötən ildən daha da aktivləşib. Müvafiq qurumların baxışından sonra ərazi təhlükəli elan olunub. Bu səbəbdən sakinlər qohumlarının evlərinə yerləşdirilərək onlar üçün daha təhlükəsiz evlərin tikilməsi qərara alınıb. Artıq bir aydan çoxdur ki, tikinti işlərinə başlanılıb.
Layihə rəhbəri, Rauf İsmayılov bildirib ki, bir neçə hektar ərazidə 18 fərdi yaşayış evinin tikintisi nəzərdə tutulub. Hər ev üçün 6 sot həyətyanı sahə ayrılıb. “Bura dağlıq ərazidi, yəni relyefi çətin bir zonadır. Onun görə də materialların bura daşınması üçün layihədən kənar 3 km yol xətti çəkmişik. 4 km məsafədə su xətti çəkmişik. Bugünkü gün, demək olar ki, materiallarımızın 80%-ni əraziyə artıq qaldırmışıq. Işlərimiz tam sürətlə davam edir.
Layihəmizin müddəti 150 gün nəzərdə tutulub. Bu da noyabr ayının 31-nə təsadüf edəcək. Bura dağlıq zona olduğuna görə, hava şəraiti dəyişkən olur, tez-tez yağışlar yağır. O vaxta qədər çalışacağıq ki, sakinlər öz evlərinə yerləşsinlər”.
Qeyd edək ki, tikintidə mütəxəssis heyəti də daxil olmaqla 150-dən çox işçi çalışır. Işçi qüvvəsinin əksəriyyəti Şümrüd və ətraf kəndlərin sakinləridir.
