Astara sakini videoçəkiliş üstündə adam döyüb. Hadisə ötən ilin dekabrın 20-də Bakının Binə qəsəbəsində baş verib.
Astara sakini, 1980-ci il təvəllüdlü Elşən usta işlədiyi yerdə Qədirin onu telefonla videoya çəkməsinə etiraz edib. Mübahisə zamanı Elşən əlindəki bel ilə Qədirə zərbə endirib. Nəticədə Qədir dirsək və baldır nahiyəsindən xəsarət alıb.
Məhkəmədə Elşən bildirib ki, qarşı tərəf əlində bıçaqla ona yaxınlaşdığından, yalnız özünü müdafiə edib. Zərərçəkmiş isə deyib ki, tikinti işlərinin videosunu sübut üçün çəkirmiş və hücuma məruz qalıb.
Xəzər Rayon Məhkəməsinin hökmü ilə Elşən Cinayət Məcəlləsinin 128-ci maddəsi ilə təqsirli bilinib və 7 ay 26 gün müddətinə azadlığın məhdudlaşdırılması cəzası alıb.
O, bu müddət ərzində axşam 23:00-dan səhər 07:00-dək evdən çıxmamalı, elektron nəzarət cihazı gəzdirməli və şəhəri tərk etməməlidir.
