Astara rayon İcra Hakimiyyətinin başçısı Qəzənfər Ağayev Suparibağ inzibati ərazi dairəsi üzrə nümayəndəliyin Seləkəran kəndində sakinlərlə səyyar qəbul-görüş keçirib. Bu haqda məlumatı Cenublu.az bu gün, 29 sentyabr tarixində Astara RİH-yə istinadən verir.
Görüş zamanı icra başçısı qeyd edib ki, Seləkəran kəndində quruculuq-abadlıq sahəsində müəyyən işlər görülüb. Əvvəllər Astaraçayda suyun səviyyəsinin qalxması nəticəsində ərazini su basırdı və fərdi təsərrüfatlara ziyan vurulurdu. Lakin çayda sahilbərkitmə işləri aparılandan sonra bu problem həllini tapıb.
Sakinlər isə öz növbələrində kənd ara yollarının, qəzalı vəziyyətdə olan telefon xətlərinin və dirəklərinin təmiri, elektrik xətt təsərrüfatının yenilənməsi, Seləkəran kənd ümumi orta məktəbinin qarşısında piyada keçidi üçün yol nişanının qoyulması, dəyişdirilmiş qaz sayğaclarında yazılan əsassız cərimələrin araşdırılması, yeni məktəb binasının tikintisi, kəndə içməli su xəttinin çəkilməsi barədə təkliflər veriblər.
İcra başçısı sakinlərin arzu və təkliflərini dinləyərək, həlli mümkün olan məsələlərlə əlaqədar rayonun təsərrüfat və xidmət sahələrinin rəhbərlərinə tapşırıqlar verib.
