Bu gün, 29 sentyabr tarixində Ruslan Aslan oğlu Əliyevin şəhidlik zirvəsinə ucaldığı gündür.
Ruslan Əliyev 8 aprel 2000-ci ildə Astara rayonunun Ərçivan qəsəbəsində anadan olub. O, Ərçivan qəsəbəsi 4 saylı tam orta məktəbdə oxuyub. Ruslan yeniyetmə və gənc yaşlarında Astara Boks mərkəzində boksla məşğul olub, təlim məşqlərində, rayon və respublika yarışlarında müntəzəm iştirak edib, uğurlar qazanıb. Boks üzrə Azərbaycan birinciliyinin ikiqat gümüş və bürünc medalçısı, Azərbaycan yığma komandasının üzvü olub. 2018-ci ildə Goranboy, Mingəçevir, Tərtər bölgələrində hərbi xidmətdə olub. 2020-ci ildə hərbi xidmətdən qayıtdıqdan sonra "MAHHXHQ əsgər" kimi çalışmağa başlayıb.
Vətən müharibəsi zamanı Ağdərə istiqamətində ermənilərin çoxlu texnika və canlı qüvvəsini məhv edib. 29 sentyabr 2020-ci ildə Tərtərin Talış kəndi uğrunda gedən döyüşlərdə şəhid olub. Onun nəşi doğulub boya-başa çatdığı Astara rayonunun Ərçivan qəsəbəsində dəfn edilib.
Ölümündən sonra “Vətən uğrunda” medalı ilə təltif olunub.
