Pərvin Salmanzadə 17 sentyabr 1991-ci ildə Astara rayonunun Pensər kəndində anadan olub. 3 bacı və 1 qardaş olmaqla onlar ailədə 6 nəfər olublar. 1997-2008-ci illərdə Astara rayon Mirzə Fətəli Axundzadə adına Pensər kənd 1 saylı tam orta məktəbində təhsil alıb. 2009-cu ildə hərbi xidmətə yola düşür. Hərbi xidməti başa vurduqdan sonra o bir müddət "Azpetrol LTD" MMC-də inspektor vəzifəsində çalışır. Daha sonra Pərvin orduda MAXE hərbi qulluqçu kimi xidmət etməyə başlayır.
Vətən müharibəsi zamanı o, Ağdərə və Xocavənd istiqamətlərində gedən döyüşlərdə qəhrəmanlıq və igidlik göstərərək, düşmənin xeyli sayda canlı qüvvəsini məhv edir. 6 noyabr 2020-ci ildə Şuşa şəhərinin azadlığı uğrunda gedən şiddətli döyüşlərdə komandiri və əsgər yoldaşlarını xilas edərkən qəhrəmancasına şəhid olur. Şəhidin nəşi Astara rayonunun Pensər kəndinə gətirilir və Seyid Camaləddin türbəsində dəfn olunur.
Pərvin Salmanzadə ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə", "Füzulinin azad olunmasına görə", "Xocavəndin azad olunmasına görə" , "Şuşanın azad olunmasına görə" və "Döyüşdə fərqlənməyə görə" medalları ilə təltif olunub.
