Lənkəran rayonunun Aşağı Nüvədi qəsəbəsinin iki küçəsində – Şəhid Romir Əliyev və Şəhid Həbib Bağırov küçələrində qaz təzyiqinin gecə saatlarında azalması sakinlərin narazılığına səbəb olub.
Şikayətçilərin Cenublu.az-a bildirdiklərinə görə, artıq 15 gündür ki, eyni problem təkrarlanır. Qaz təzyiqi saat 17:00-dan 22:00-a qədər, demək olar ki, tamamilə düşür və evlərin qızdırılması mümkün olmur. Sakinlər bildirirlər ki, bu saatlarda soyuq səbəbindən həm uşaqlar, həm də yaşlılar əziyyət çəkir.
Onlar qeyd edirlər ki, məsələ ilə bağlı dəfələrlə aidiyyəti qurumlara müraciət edilsə də, heç bir tədbir görülməyib.
Qəsəbə sakinləri problemin aradan qaldırılması üçün məsələni diqqətə çatdırır və aidiyyəti qurumlardan operativ şəkildə reaksiya göstərilməsini xahiş edirlər.
