Araz çayı üzərindəki Bəhrəmtəpə hidroqovşağında qəza vəziyyətinin aradan qaldırılması tədbirlərinə sərf olunacaq vəsaitin həcmi açıqlanıb.
Bu barədə İqtisadiyyat.az Azərbaycan Dövlət Su Ehtiyatları Agentliyindən (ADSEA) məlumat əldə edib.
Belə ki, Agentliyin tabeliyindəki Tikilməkdə Olan Obyektlərin Müdiriyyəti sözügedən işlərin icrasını “Teymur-M” Məhdud Məsuliyyətli Cəmiyyətinə həvalə edib və onunla müqavilə bağlayıb.
Müqaviləyə əsasən, Bəhrəmtəpə hidroqovşağında qəza vəziyyətinin aradan qaldırılması tədbirləri 11.843.596,64 manata başa gələcək.
Qeyd edək ki, Bəhrəmtəpə hidroqovşağı Araz çayının İmişli rayonundan keçən hissəsində yerləşir.
1958-ci ildən istifadəyə verilən Bəhrəmtəpə hidroqovşağı 6 rayonu (İmişli, Saatlı, Sabirabad, Biləsuvar, Cəbrayıl və Cəlilabad rayonları) suvarma suyu ilə təmin edir.
